انا عايزة اتغطى... انا مش وسيلة لمتعتك

السلام عليكم ورحمة الله وبركاته
بسم الله والحمد لله والصلاة والسلام على من لا نبي بعده

ايوه انا عايزة أتغطى انا مش جسمي رخيص علشان اخرج وانت تتمتع
انا ادفع اد كده في لبسي ويبقى غرضي الوحيد انى ابقى ماشية راضية عن نفسي وشكلي
وانت بكل بساطة تفصص فيا بعيونك وممكن تلمسنى كمان بس علشان تشبع رغبتك

يعنى انا بخرج كل يوم علشان امتعك!!!

يااااه على نظرتك لما ابقى ماشية وعيونك مش سايبانى جايبة كل حتة فيا وانا اصلا ماشية في حالي ماليش دعوة بيك

مش هقدر اقولك احترم نفسك وماتبصش لان للاسف ليك الف نسخة زيك !

اللي اقدر اقولو ان انا اللى لازم اغطى واداري جسمي ومش اعطيك الفرصة

انا غاليه وجسمى غالي ومش اي حد يستحق النظر ليه .. هو واحد زوجي اللى ربنا قدرهولي .. مش حتى خطيبي

دي يا بنات كانت فضفضة بيني وبين نفسي
لما فمرة كنت خارجة ولابسة اللبس العادي بتاعي كان بنطلون واسع وعليه

تونك طويل وكان فيه بنات ماشيه بلبس عادي برده ولاقيت مجموعة شباب باصين لهم بصورة غريبة عارفين اللى بيجيب كل حتة في جسمك

نفس الاحساس برده في موقف تانى وبنفس استايل لبسي وفي محطة المترو وماشية علشان اروح اقف في مكان السيدات

وعلى بال ما مشيت الكام خطوة دول حسيت اد ايه الشباب مدي لنفسه الحق فينا بشكل غريب والله نظرات غريبة ومختلسة وكأنه

حق مكتسب

فكرت مع نفسي يعنى انا اخرج اشتري اغلى لبس وادفع فيه مبلغ محترم واقف ساعة قبل مأخرج اظبط لبسي

وكل غرضي ان ابقى
مقتنعة بنفسي وسعيدة بمظهري مش علشان حضرتك تبص بكل سهولة

...
وفعلا الحمد لله دعيت ربنا وخدت القرار وغيرت استايل لبسي تدريجيا

وكل خطوة اخدها تبقى عن اقتناع وتفكير والحمد لله ربنا يثبتني ويهدينا للصح ولرضا ربنا..

عارفين يا بنات دلوقتى ببقى ماشية وجواية ابتسامة لكل واحد في الشارع
انك مش هتقدر تخطف منى حاجة بنظرتك

احساس جميل بالستر الحمد لله

في حفظ الله ورعايته